| abstract | - Don Quijote descrive la aventures de un nobil espaniol ci, pos leje naradas de cavaloria, comensa de crede ce el es un cavalor ci debe batalia la nonjustias en mundo. El viaja xercante aventures con se acompanior Sancho Panza, un cultivor naive. La imajina de Quijote frecuente core con el e el vide molines de venta como jigantes e imajina oteles campanian como casteles. El ia intende la novela como satira sirca naradas de cavaloria en edas media, ma el ia pinta un pitur rica de vive espaniol e metafores briliante. Don Quijote ia ave influe vasta a la developa de naradas de prosa e deveni sujeto de multe operas diferos en campas de arte, filma, baletia, opera e pinta. En un vileta de La Manga, de cual me ave no desira de recorda se nom, a no multe tempo ante aora, un senior ia abita de acel spesie ci garda un lansia en la portalansia, un peti scermo vea, un cavalo magra, e un lepror per corsa. Un vaso de carne alga plu de bove ca de ovea, un salada a la plu de seras, duelos y quebrantos a saturdis, lentiles a venerdis, e un pijon plu a la soldi, ia consuma tre cuatris de se revenu. La resta de lo ia desapare contra un jaca de stofa amirable e un pantala de veluda con sapatos corespondente per festas, e en dias de semana el ia presenta un figur corajosa en se vestes la plu bon, texeda a casa. El ia ave en se casa un manejor con plu ca cuatrodes anios, un sobrina con min ca dudes, e un xico per la campo e la mercato, ci ia tende ensela la cavalo e maneja ance la desramador.
|
